የእንግሊዝ ፕሪሚየር ሊግ የማንቸስተር ሲቲን ይግባኝ ውድቅ ማድረጉ ተዘገበ

ማንቸስተር ሲቲ የውድድር ዘመኑ ሊጠናቀቅ አንድ ወር ብቻ ሲቀረው፣ በሰባት ዓመታት ውስጥ ለሁለተኛ ጊዜ በሀገር ውስጥ ያሉ ሦስት ዋና ዋና ዋንጫዎችን (treble) በአንድ ላይ ለማንሳት እየተጋ ነው።

ፔፕ ጋርዲዮላ እ.ኤ.አ በ2018/19 ክለቡን ለፕሪሚየር ሊግ፣ ለኤፍ ኤ ካፕ (FA Cup) እና ለካራባኦ ካፕ ድል መርቶ የነበረ ሲሆን፣ የቀድሞው የባርሴሎና አሰልጣኝ በዘንድሮው የውድድር ዘመንም ያንን ስኬት ለመድገም አልሟል።

ባለፈው ወር በካራባኦ ካፕ ፋይናል አርሰናልን ማሸነፍ የቻለው ሲቲ፣ በሊጉ የዋንጫ ፉክክር ከአርሰናል በሦስት ነጥቦች ዝቅ ብሎ (አንድ ቀሪ ጨዋታ እያለው) በሁለተኛ ደረጃ ላይ ይገኛል። እንዲሁም ግንቦት 8 (May 16) በዌምብሊ ስታዲየም በሚደረገው የኤፍ ኤ ካፕ ፍጻሜ ከቼልሲ ጋር ይፋጠጣል።

ፕሪሚየር ሊጉ የሲቲን ጥያቄ ውድቅ ማድረጉ ለአርሰናል እገዛ ሆኗል

የሲቲ በዋንጫ ጨዋታዎች ላይ መሳተፍ ሁለት የሊግ ጨዋታዎች እንዲራዘሙ አስገዳጅ ሆኗል። እነዚህም በመጋቢት ወር ሊደረግ የነበረው የክሪስታል ፓላስ ጨዋታ እና የኤፍ ኤ ካፕ ፋይናል ማግስት ሊካሄድ የነበረው የቦርንማውዝ ጨዋታ ናቸው።

ፓላስ በኮንፈረንስ ሊግ ግማሽ ፍጻሜ ላይ በመገኘቱ የጨዋታ መደራረብ ስላለበት፣ የፓላስ ጨዋታ የሚካሄድበት ቀን እስከ አሁን በይፋ አልተቆረጠም ነበር፤ ሆኖም በጊዜያዊነት ረቡዕ ግንቦት 5 (May 13) እንዲደረግ ታስቦ ነበር። ሲቲ ግን ለዌምብሊው የፍጻሜ ጨዋታ ተጨማሪ የማገገሚያ ቀን ለማግኘት ሲል፣ መጀመሪያ ቦርንማውዝን ግንቦት 4 (May 12) እንዲገጥም እና ፓላስን ከሰባት ቀናት በኋላ እንዲጫወት ለሊጉ ጥያቄ አቅርቦ ነበር። ይህ ቢሆን ኖሮ ጋርዲዮላ የመጨረሻዎቹን ሁለት የሊግ ጨዋታዎች በሜዳው የማድረግ ዕድል ያገኝ ነበር።

ይሁን እንጂ የፕሪሚየር ሊጉ መመሪያ እንደሚያዘው፣ ከአንድ በላይ ጨዋታዎች ሲራዘሙ ቀድሞ በፕሮግራም ተይዞ የነበረው ጨዋታ (በዚህ ሁኔታ የፓላስ ጨዋታ) ቀድሞ መደረግ አለበት። ዘ ሚረር (The Mirror) እንደዘገበው፣ ሊጉ ሲቲ የቦርንማውዝ እና የፓላስን ጨዋታዎች እንዲቀያይር ያቀረበውን ጥያቄ ውድቅ አድርጎታል።

ይህ ማለት የጋርዲዮላ ቡድን የውድድር ዘመኑን የመጨረሻ አራት ጨዋታዎች በ12 ቀናት ውስጥ ብቻ ለማድረግ ይገደዳል፦

• ግንቦት 5 (May 13): ከክሪስታል ፓላስ (በሜዳው)

• ግንቦት 8 (May 16): የኤፍ ኤ ካፕ ፋይናል (ከቼልሲ ጋር)

• ግንቦት 11 (May 19): ከቦርንማውዝ (ከሜዳው ውጪ)

• ግንቦት 16 (May 24): ከአስቶን ቪላ ጋር የመጨረሻ የሊግ ጨዋታ (በሜዳው)

የቦርንማውዝ ጨዋታ ግንቦት 12 (May 20) ሊደረግ ያልቻለበት ምክንያት፣ በዚያው ምሽት አስቶን ቪላ ወይም ኖቲንግሃም ፎረስትን የሚያሳትፈው የዩሮፓ ሊግ ፋይናል ስለሚካሄድ ነው። ዩኤፋ (UEFA) አንድ የእንግሊዝ ክለብ በአውሮፓ ፋይናል በሚጫወትበት ምሽት የፕሪሚየር ሊግ ጨዋታ እንዲኖር አይፈልግም።

የአርሰናል ተስፋ

የዋንጫ ተፎካካሪው አርሰናል በተቃራኒው በተቀናቃኙ የጨዋታ መደራረብ ተጠቃሚ ለመሆን ተስፋ ያደርጋል። ምንም እንኳን መድፈኞቹ በቻምፒዮንስ ሊግ ግማሽ ፍጻሜ ከአትሌቲኮ ማድሪድ ጋር ለሚቀጥሉት ሁለት ሳምንታት የሚደረጉ ከባድ ጨዋታዎች ቢጠብቋቸውም፣ በሊጉ ያላቸው የጨዋታ ፕሮግራም በአንጻራዊነት የተሻለ ነው።

የሚኬል አርቴታ ቡድን የመጨረሻ አራት ጨዋታዎች ከፉልሃም፣ በርንሌይ፣ ዌስትሃም እና ክሪስታል ፓላስ ጋር ይሆናሉ።